Volve Primavera enDanza!. Artigos

Volve Primavera enDanza!

Cinco espectáculos de danza contemporánea entre o 9 e o 23 de abril entre os que se inclúe a estrea dunha nova proposta de Matías Daporta: Mocap

PROGRAMA DE PRIMAVERA ENDANZA

8 de abril de 2021 - O ciclo estable de danza contemporánea máis lonxevo de Galicia cumpre 19 anos regresando ao seu espazo natural, o mes de abril. Se ben a XVIII Primavera enDanza tivo que celebrarse en outono de 2020 por mor da pandemia, este ano volve para a nova edición con cinco espectáculos que conmemoran o Día Internacional da Danza, o 29 de abril, como é o habitual. Espallaranse entre o 9 e o 23 do mes con catro compañías galegas e unha catalana e a presenza dunha estrea por parte de Matías Daporta con Mocap. Daporta iniciou o seu proxecto en Carballo durante unha residencia no Pazo da Cultura e volve para realizar outra residencia técnica, neste caso de dous días, e ofrecer agora o espectáculo en exclusiva o día 22.

O ciclo comeza o venres 9 de abril co espectáculo Emigrantas de Kirenia Martínez. Segundo a protagonista a peza aborda unha "nova emigración, desa última diáspora de persoas de 18 a 40 anos que saíron e viven a súa experiencia central dende a muller”. Outra muller, Marta Alonso, é a creadora e protagonista de Bailar agora, a proposta que poderemos ver o día 16. É un espectáculo “autobiográfico” e cheo de sorpresas que “hai que vivir”, polo que o mellor é descubrilas en directo. Marta Alonso estará dobremente presente nesta Primavera enDanza, posto que tamén participará o día 18 no espectáculo infantil e familiar Nina Ninete de Paula Quintas e Traspediante. Para rematar, dende Barcelona chega Thomas Noone Dance con After the party, unha conversa entre Thomas Noone e o seu alter ego, na que un home reflexiona sobre encontros pasados e na que as verdades, soños e mentiras son expresadas con danza e un monicreque rebelde. As entradas para todos os espectáculos poderán mercarse a través de <ataquilla.com>.

PROGRAMACIÓN

Venres 9 de abril (20.00 horas). Emigrantas, Kirenia Danza (Galicia). Público adulto.

Venres 16 de abril (20.00 horas). Bailar agora, Marta Alonso Tejada (Galicia). Todos os públicos.

Domingo 18 de abril (18.00 horas). Nina Ninette, Paula Quintas – Traspediante (Galicia). Público infantil e familiar.

Xoves 22 de abril (20.00 horas). Mocap, Matías Daporta (Galicia). Estrea absoluta. Público adulto.

Venres 23 de abril (20.00 horas). After the party, Thomas Noone Dance (Cataluña). Público adulto.

Descargas

Programa de Primavera enDanza [PDF]