Queres cultura? En Carballo temos con forza!
Entre marzo e maio ofrecemos máis de 25 actividades con cinema, expos, teatro, danza... e que nos axudarán a demostrar que a cultura é segura!
Ademais, xunto a todas as medidas de prevención da COVID-19, seguiremos apostando polas retransmisións en streaming da maior parte dos espectáculos, trasladando o escenario do Pazo da Cultura, a Biblioteca Rego da Balsa ou o Mercado Municipal, onde se desenvolverá unha das propostas, aos fogares dos carballeses e carballesas e tamén de todas as persoas de fóra de Carballo que teñan gañas de desfrutar unha vez máis coa cultura.
Programación
Respecto dos espectáculos que poderán disfrutarse ao longo destes meses, podemos dividilos en varios grandes bloques, tanto temporais como temáticos:
- MARZO: dende o venres 5 e até o domingo 28 do mes haberá música con Aldaolado; monólogo con Avelino González; teatro con Inventi ou La Quintana; circo con SU.MA ou Maintomano; e narración oral con Guti, Celso Sanmartín e Quico Cadaval na proposta "Tres vellas (polo menos)".
- ABRIL CON PRIMAVERA ENDANZA: dende o día 9 até o 23 volve un dos escasísimos ciclos estables de danza contemporánea en Galicia: Primavera enDanza. Kirenia Danza, Traspediante, Marta Alonso Tejada, Matías Daporta ou Thomas Noone Dance conforman un programa que sempre está a vangarda e que volve cada ano como un dos bastións do mundo da danza.
- MAIO: No mes de maio hai propostas para os días 8 e 9 do mes con dous espectáculos teatrais. "Bernarda" de Malasombra e para o público infantil "Cartoons" de PT Excéntricas. O mes completarase coas citas con motivo do Día das Letras Galegas, que aínda está por definir ou con propostas musicais. Estade atentas/os!
Ademais, ao longo destes tres meses de "Cultura con forza" poderemos desfrutar con produtos audiovisuais de calidade con Docus Galegos, ou o ciclo de cinema euroárabe Amal en ruta, que sae de Compostela para viaxar ata Carballo. Os Ratos de Loxedetodo da compañía Trinke Trinke seguirán na Biblioteca Rego da Balsa ofrecendo os seus contacontos para nenas e nenos de entre 5 e 7 anos. Haberá ata catro exposicións no Pazo da Cultura ou mesmo unha conferencia sobre a influencia dos conflitos bélicos na arte analizando artistas como Goya e Picasso, pero tamén galegos como Castelao ou Luís Seoane, entre outros.
Xa sabedes, reservade un oco estes meses para poder vivir a cultura de forma segura e cunha variedade de propostas que chega a todos os públicos. Cultura con forza!
