Contacontos, proxeccións, faladoiros, escritores e moita diversión na Biblioteca Rego da Balsa!
Nas instalacións da rúa Bos Aires poderedes encontrar autores como Manuel Rivas, historias para nenos con TrinkeTrinke ou concursos e obradoiros
Manuel Rivas na Praza dos Libros de Carballo
Se queredes animar as vosas tardes de inverno non podedes faltar ás actividades que organiza a Biblioteca Rego da Balsa o primeiro trimestre do ano. Atoparedes un completo programa no que todas as citas son de balde! Presentacións de libros, faladoiros, proxeccións, contacontos ou obradoiros para nenos e nenas invaden as instalacións da rúa Bos Aires entre o 13 de xaneiro e o 31 de marzo.
Entre todas as citas, hai que subliñar a visita do autor galego Manuel Rivas, que o 28 de xaneiro presentará o seu traballo "O último día de Terranova" a emocionante vida dunha libraría na que conflúen historias de amores, libros prohibidos, náufragos da vida e a memoria oculta da nosa historia recente a través da vida de Vicenzo Fontana. Estamos no ano 2014 e a libraría Terranova corre o perigo de desaparecer tras máis de sesenta anos de resistencia e despois de sufrir os máis duros temporais.
Ou tamén a presentación a finais de febreiro da obra de Fernando Fernández Rego "Saudade", que afonda na vida do coñecido músico Andrés do Barro, xa desaparecido, e que coa canción "Corpiño xeitoso" conseguiu ser número 1 nas listaxes de éxitos en España no ano 1970. Tivo o mérito, ademais, de ser un dos primeiros cantantes que usaron o galego durante a ditadura franquista. E máis aló dos libros, haberá proxeccións de documentais -cun ciclo especial dedicado ao medio ambiente- e faladoiros sobre temas tan variados como a Amazonía, os estilos de vida saudables ou os nosos soños e metas persoais.
Sesións dobres de contacontos co novo ano
Moitos nenos e nenas acoden a ver as historias de Trinke Trinke
Os máis pequenos e pequenas da casa sempre teñen un espazo especial nas instalacións da Biblioteca, neste caso continuando coas historias dos ratos de Lonxedetodo, Fuco e Lili Gruyére, que achegarán moitos mércores ás 17.30 e 19.00 h., en dúas sesións, contacontos para nenos e nenas de 3 a 8 anos. Duplicáronse as funcións para poder atender a elevada demanda, xa que a partir de agora en lugar de aforo para 60 nenos e nenas haberá espazo para 120. Animais, princesas, reis e criaturas máxicas cos e coas que xogar son só algúns dos personaxes que ocuparán o maxín de quen queiran visitar a Rego da Balsa. Ademais, haberá obradoiros de maquillaxe e de disfraces no Entroido, tamén na Ludoteca, e continúa o ciclo de "Pais e nais contan", no que os usuarios da biblio ofrecen contacontos relatados por eles mesmos.
E a partir do 1 de febreiro poderedes participar na segunda edición do concurso fotográfico #Biblionamórame, no que o ano pasado os usuarios da biblio seleccionaron o material ou o recuncho que máis lles gustou das instalacións, o publicaron nas redes sociais e gañaron un paquete formado por un libro, un CD e un dvd. As bases publicaranse proximamente no web da biblio.
Comeza o 2016 con bo pé nas Bibliotecas de Carballo!
