O  Vesubio foi o primeiro local de comida italiana que se abriu en Carballo, hai xa máis de dúas décadas. Hoxe en día, segue a ser o único con menú e espírito de restaurante, alén da típica pizzería. Refugan da comida rápida, "aínda que nós sexamos rápidos", di, con humor, o cociñeiro e propietario, Miguel Giaquinto. O seu son os pratos preparados con esmero. Ao Vesubio (Avenida Ponte da Pedra, 24, tfno. 981 70 18 84)  diferénciano a materia prima e o modus operandi directamente importados de Italia, como nos amosan con esta lasaña con boletus e castañas.

Ingredientes para seis persoas

1 kg de boletus

1/2 kg de castañas cocidas

Salsa bechamel

Queixo parmesano

Placas de lasaña

Ingredientes para a bechamel:

Aceite de xirasol, manteiga, leite, fariña e noz moscada

Preparar a bechamel e a pasta de boletus e castañas

Quentamos o aceite e a manteiga xuntos. Para litro e medio de leite, empregamos medio vaso de aceite, 30 gramos de manteiga e ao redor de 50 gramos de fariña. Remexemos todo, engadimos o leite e seguimos remexendo. Engadimos a noz moscada.

Douramos os boletus e as castañas no aceite de oliva con allo picado. É conveniente, para intensificar o sabor, deixar a macerar o allo picado no aceite ao menos dous días. Os boletus non os lavamos, só lle limpamos a base cun coitelo de serra. Engadimos un vaso de viño branco e un vaso de auga.

Remexemos e deixamos que se fagan (como moito, dez minutos). Dámoslle o toque picante incorporando unha salsa a base de aceite napolitano e chile. Con isto quédanos xa unha pasta ben saborosa pero, ademais, na trattoria Vesubio incorporan outros dous ingredientes, que prefiren deixar en segredo, e que fan que a súa lasaña sexa única

Preparar a lasaña

Incorporamos, no fondo do molde que vaiamos utilizar, unha base de bechamel para que a lasaña non se peque. Por encima, unha capa de placas de lasaña, e logo outra capa de boletus e castañas (é importante que a pasta nos quede ben distribuída).

Cubrimos cunha boa capa de queixo parmesano, que é o que lle dá sabor ao prato, outra capa de placas, salsa bechamel e unha última capa de queixo parmesano.

Botámolo ao forno, un cuarto de hora a 300 graos, até que gratine.

Ligazóns